ҰБТ... Ұлттық бірыңғай тестілеу... Осы сөздер қазіргі кезде қоғамға таныс және бір жағынан сыры көп беймәлім жағдайда. Жыл сайын болатын ҰБТ төңірегіндегі түрлі жағдайлар мектеп бітіруші оқушылардың ғана емес, ұстаздары мен ата-аналарының да білім, тәрбие, болашаққа бағдар мәселелері бойынша сыналатын кезеңі болуда.
2015 жылғы ҰБТ кезеңі өз ерекшелігімен бастау алды. Ерекшелігі биылғы тестілеуге азаматтық бақылаушылардың қатысуы және заңсыздықтардың болдырмау мен алдын-алуға көмек қолын созуы. Республикалық 45minut.kz басылымы өз тарапынан осындай игі бастамаға атсалысып, «Азаматтық бақылаушы кім және қандай міндеттері бар, ҰБТ-ға көмектесеме әлде кедергі ме?» деген сауалдарға жауабын тапты.
Мен де Республикалық 45minut.kz басылымы редакциясының Батыс өңіріндегі ресми өкілі ретінде, Ақтөбе облысы бойынша өтетін ҰБТ-ға азаматтық бақылаушы ретінде қатысуға ұсынылдым. Азаматттық бақылаушылар жұмысы алғашқы рет ұйымдастырылып отырғандықтан басқа облыстарда түсініспестік жағдайлардың орын алуы, азаматтық бақылаушыларды қатыстырмау, жұмысына кедергі келтіру фактілері орын алғанын белгілі болды.
«ҰБТ-ға мені де қатыстырмаса қайтемін» - деген ойларыммен ең бірінші Ақтөбе облыстық білім басқармасына және Ақтөбе облыстық білім саласындағы бақылау департаментіне хабарласып қатысу туралы ұсынылғанымды білдірдім. Мекеме қызметкерлері өтінішімді қабылдап, азаматтық бақылаушылар қатысуы туралы хабардар екенін білдіріп, қатысуыма рұқсат берілгенін және сәтті өтуіне тілектерін білдірді. Осындай жылы қабылдау нәтижесінде Ақтөбе облысы, Шалқар ауданында 05 маусым 2015 жылы ҰБТ-ға азаматтық бақылаушы ретінде қатыстым.
Азаматтық бақылаушы дегеніміз ол министрліктің комиссиясы немесе ҰБТ-ның жаман жақтарын тізбелеп жинақтаушы емес, ҰБТ әділ және заңды өтуі үшін көмектесуші және қоғамның өкілі екенін білуіміз керек. Азаматтық бақылаушы ретінде байқағаным ҰБТ-ның жылдан-жылға өткізілу сапасы жоғарылап келеді. ҰБТ үшін барлық жағдайлар жасалуда. ҰБТ-ның жақсы ұйымдастырылуы және оқушылар мен ата-аналардың арасында түсіндірме жұмыстырының алдын-ала жүргізілгені, сынақты тиісті дәрежесінде өткізуге көмектесуде.
Ал, ҰБТ кезіндегі кемшіліктер болашақта толықтай жойылады деп сеніммен айтуға болады. Ол үшін ҰБТ-ға жауапты мемлекеттік мекемелер тарапынан кәсіптік ұйымдастыру мен өткізілуі, ал ата-аналар мен азаматтық бақылаушылар өз тарапынан көмектесулері қажетті. Себебі, оқушыларымыз біздің болашағымыздың көрінісі...
Азаматтық бақылаушы ретінде қызметімді тиісті дәрежесінде атқаруға жағдай жасаған, ақыл-кеңестерімен көмектесіп, білікті де білімді басшы екенін көрсеткен Ақтөбе облыстық білім басқармасы басшысы Жанат Бақытжанқызы Самұратоваға және Ақтөбе облыстық білім саласындағы бақылау департаменті басшысы Көшербаев Әкімгерей Кәдірбекұлына ерекше алғысымды білдіремін.
Мақала соңында Ақтөбе облыстық білім саласындағы бақылау департаменті басшысы Көшербаев Әкімгерей Кәдірбекұлымен болған қысқаша сұхбатты назарларыңызға ұсынамын.
- Сіз басқарып отырған мекеме жұмысы және жетістіктерімен оқырмандарымызды таныстырсаңыз...
2011 жылы 7 шілдеде Қазақстан Республикасы Үкіметінің № 778 қаулысымен Қазақстан Республикасы Білім және ғылым министрлігі Білім және ғылым саласындағы бақылау комитеті жанынан бірыңғай орталықтандырылған негізде барлық облыстарда Білім саласын бақылау департаменттері құрылды. Қызметі – білім беру ұйымдарының мониторингі, білім беру мекемелерін мемлекеттік аттестациядан өткізу, білім заңдылықтары мен басқа да құқықтық нормативтік актілердің орындалуын тексеру, ұлттық бірыңғай тесттік дұрыс өткізілуін бақылау, білім беру ұйымдарын лицензиялау және оқу жетістіктерін сырттай бағалаудың дұрыс ұйымдастырылуын бақылау.
Департамент Қазақстан Республикасы Білім және ғылым министрлігі Білім және ғылым саласындағы бақылау комитетінің 2015 жылға арналған медиа-жоспарын басшылыққа алып, тұрғындар арасында ұлттық бірыңғай тестілеу (ҰБТ) және білім жетістіктерін сырттай бағалауды (БЖСБ) ұйымдастыру және өткізу жөніндегі ақпараттық-түсіндіру жұмыстарын жүргізді.
Департаменттің мақсаты – білім саласындағы кемшіліктерді жою, білім сапасын арттыру, оқушының тұратын жеріне (қала немесе ауыл), ұлтына, жасына, денсаулығына қарамастан сапалы білімге тең қолжетімді жағдай туғызу.
Департамент мамандары облыстағы білім беру мекемелеріне барып, кадрлардың сапалық құрамы, балалардың білімі, материалдық базасына, оқу орнының жалпы жағдайына мониторинг жүргізеді.
Сонымен қатар облыс көлеміндегі 443 жалпы білім беретін мектептер, 528 мектепке дейінгі ұйымдар мен 42 техникалық және кәсіптік білім беру мекемелерінде мемлекеттік аттестация, жоспарлы тексерістер жүргізіліп, білім беру ұйымдарында ҚР «Білім туралы» Заңы, мемлекеттік жалпыға міндетті білім беру стандарты талаптарының орындалуына бақылау жасалады.
Облысымыздағы білім сапасының жағдайы туралы облыс, қала, аудан әкімдеріне хаттар жазылады. Мектептерді тексеру барысында мектепішілік басқару мен бақылау жайына бағыттар беріліп, облыстық білім басқармасына хаттар жолданып, ұсыныстар беріледі. Жолданған хаттар нәтижесінде қазіргі таңда облыс, қала, аудан әкімдері тарапынан оң шешімдер қабылданып, жалпы білім беретін мектептердің оқу-тәрбие үрдісіне қажетті құралдардың қамтылуына қаржы бөлініп, шаралары алынуда.
- Ақтөбе облысы бойынша 2015 жылғы ҰБТ нәтижелері қандай?
ҰБТ-ға облыс бойынша 4621 оқушы қатысты. Орташа балл 82,69 болды. 339 үміткердің 152-сі «Алтын белгі» иегері болды. (45%)
Азаматтық бақылаушылардың ҰБТ кезіндегі маңыздылығы туралы пікіріңіз?
Азаматтық бақылаушылар өте қажет. Себебі, біз ҰБТ процедурасының әділ өтуін қадағалаймыз. Алайда, ҰБТ кезінде түрлі заңсыздық әрекеттердің орын алуы мүмкін. Бұл ҰБТ-ға кедергі келтіреді. Түрлі жағдайлардың біржақты баяндалмауы үшін тәуелсіз азаматтық бақылаушылардың болғаны маңызды. Сондықтан азаматтық бақылаушылар қоғамның өкілдері ретінде заңсыздықтардың алдын-алуға және болдырмауға көмектесуде тиімді нәтижелері болады деп есептеймін.
Ұстаздарға арналған 45minut.kz Республикалық басылымы оқырмандарына айтар тілегіңіз.
Барлық ұстазға шынайы ұстаз бақытын тілеймін. Бүгінгі түлектеріңіз ертең елдің аяулы азаматы болып ұстаздық еңбектің шынайы бағасына лайық екенін көрсете білсін. Отбасыларыңыз аман, Сіздерге әрдайым тірек болсын. Оқушыларыңызды тек қана әділдікке үйретіңіз.
Сұхбат бергеніңізге алғыс білдіремін.
Республикалық 45minut.kz басылымының тілшісі
Шынаргул Нагиева
Просмотров материала: 3 180
