Мәңгілік махаббат дастаны

Қазақ халқының тарихында ғұндардан бастау алатын «Мәңгілік ел» идеясын тасқа қашап жазылған Орхон-Енисей ескерткіштерінен, мәңгілік өмірді жырлаған Қорқыт ата мен өмір бойы жерұйықты іздеп өткен Асан қайғы бабамыздың мұрасынан кездестіруге болады. Олардың әрекеттерінің негізінде мәңгілік ел болуға ұмтылған, мәңгілік елді орнатуға деген құштарлық жатты.

Осы аталғандардың қатарына халқымыздың бүгінгі ұрпағына, яғни мына біздерге, үлгі болған қазақтың мәңгілік махаббатының киесі әрі символы - Қозы мен Баянның кіршіксіз махаббаттарын жатқызар едім.

Аягөз деген – аядай бұлақ деседі,
Жұрттарда қалған жұмбақты кімдер шешеді.
Аягөз болып ғасырлар алға көшеді,
Аягөз, ая – арулар елі кешегі – деп, Мұқағали ақын жырына арқау еткен Аягөз!

Иә, Аягөз десе елеңдемейтін қазақ жоқ шығар. Өйткені менің туған өлкем Аягөз – Қозы мен Баянның ақ шәйіге ораған аппақ махаббаттары бүр жарған киелі мекен. Аягөз – күллі қазақ үшін махаббат Меккесі.

Сондықтан да мен Аягөздей киелі жерде туып-өскенімді ерекше мақтанышпен айтамын.

“Мен Аягөзді сүйемін және оны таң-тамаша көремін,— деп жазды Шоқан.— Бәлкім, бұған бір кезде осы өзеннің бойында ғұмыр кешкен сұлу Баянның алтын айдарлы Қозы Көрпешке ғашықтығы жайындағы тамаша аңыздың да әсері бар шығар,” – деген Шоқандай ғұлама ғалымның сөздері мендегі туған жерге деген құрмет пен сүйіспеншілікті одан сайын арттыра түседі.

Осыдан 15 ғасыр бұрын Аягөз төсінде болған, содан бері күллі қазақты шынайы сүйе білуге, махаббатта тұрақты да табанды болуға тәрбиелеп келген Қозы мен Баянның махаббат хикаясы бүгінгі ХХІ ғасырда да өз өзектілігін жойған емес.

Неге десеңіз, қазіргі жағдайымызда жаһандану үдерісі мен теріс пиғылды қолжетімді ақпараттар легінің салдарынан жастардың бойында кездесіп жүрген жат мінезге қарсы тұра білетін иммунитетті қалыптастыру қажет.

Олай дейтінім, адам баласы – шексіз зерденің ғана емес, ғажайып сезімнің иесі. Жас адам ғажайып тамаша сезімдерді бастан өткерері сөзсіз. Осы тұрғыдан алып қарасақ, қазіргі қазақ жасы көбіне Еуропаға еліктеп, Валентин күнін тойлап жүр.

Сондай-ақ сол жастардың арасынан опасыздықпен, сатқындықпен Махаббат сынды ұлы сезімнің қадірін кетіріп жүрген қаракөз қыз-жігіттеріміз де кездесіп қалатыны шындық.

Өз кезінде шынайы да кіршіксіз таза махаббаттың жаршысы болған Абай атамыз да ондайлар туралы:
Шын көңілмен сүйсе екен, кімді сүйсе,
Бір сөзімен тұрса екен, жанса-күйсе.
Қырмызы, қызыл жібек бозбалалар,
Оңғақ пұлдай былғайды, бір дым тисе, - деген еді.

Соған қарамастан, текті, рухты, ұлтжанды жастарымыз да жетерлік. Олар осыдан бірнеше жыл бұрын шынайы махабатты насихаттайтын Қозы мен Баян махаббат күнін белгілеп, атап өтуді ұсынды.

Жастардың бұл ұсынысы да қолдау тауып, 15 сәуір Қозы мен Баян махаббат күні болып белгіленді. Ал бұл күннің мәні – келер замандарға ұлттық болмысымызбен жету үшін атаның қаны, ананың сүтімен дарыған қазақы мінезіміз бен сезімдерімізді тәрбиелеу.

Осы орайда, шынайы, ақ, адал махаббат жолындағы ерлікті паш ететін Қозы мен Баян махаббатының рөлі ерекше. Өйткені олардың махаббаты келер ғасырларда да Махаббат атты ғажайып патшалықтың аспанында жастарды тамаша сезімге жетелейтін Шолпан жұлдыз болып мәңгілік жарқырай береді.

Ғасырлардан жеткен асыл мұрамыздың жақұты «Қозы Көрпеш-Баян сұлу» жыры арқылы жеткен бабаларымыздың махаббат сынды ұлы сезімге деген талғамы ұрпағына мәңгілік тағылым болып қалатыны сөзсіз.

Ернұр ЧИНТАЕВ
9 «А» сынып оқушысы
Дулат Бабатайұлы атындағы
жалпы орта мектеп
ШҚО
Аягөз қаласы
Жетекшісі: Жанат Садвакасова

Рейтинг	Регион	Аким
219022	Алматинская область
146708	Туркестанская область
108999	Восточно-Казахстанская область

Рейтинг	Регион	Аким
339	Алматинская область
195	Туркестанская область
180	Северо-Казахстанская область

« Апрель 2024 »
Пн	Вт	Ср	Чт	Пт	Сб	Вс
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30

Мы в соц сетях:

Мәңгілік махаббат дастаны

Поделиться материалом

Другие материалы по теме

По читаемости

По материалам