Атырау – ардақты қалам » Матрица.kz - Информационно-аналитический портал

Атырау – ардақты қалам

«Толған ел - тарихын таспен жазады, Тозған ел-жаспен жазады» - дегендей қазақ халқы –алып бәйтеректей тамырын тереңге тартып, ғасырлар бойы қасиетті даласынан табан аудармай, өсіп-өркендеп келе жатқан жасампаз халық. Біз тұлпардың тұяғымен дүниені сілкіндірген көне сақтардың, ежелгі ғұндардың, ата жұртта сақтап қалған ұлылардың ұрпағымыз.

Біле білсек, бүгінгі тәуелсіздік өзінен-өзі келіп, басымызға қона қалған бақ емесі анық. Азаттық шежіресінде мыңдардың маңдай тері жатыр. Еліміздің көгінде тәуелсіздік туы желбірегеннен бері өшкеніміз жанды, өлгеніміз қайта тірілді, ата-баба дәстүрі көш түзеді, халқымыз еңсесін тіктеп жарқын болашаққа қол созды. Содан бері атқан оқтай зулап, табандатқан 25 жыл өтті. Қазақстанның жиырма бес жылдық ғұмырына көз салсақ, ауыз толтыра айтарлықтай, көкірегіңді мақтаныш сезімі кернеп еске аларлықтай жеткен жетістіктері, асқан асуларымен бағындырған жаңа белестері бар.

Тәуелсіздік табалдырығында Қазақстан қандай ел болатын? Көз алдымызға Кеңес Одағы кезінен қирап, эканомикасы қаусаған, әкімшілік пәрмені әлсіреп, нарықтық тетіктері іске аспай, шаруашылық байланыстары үзілген кешегі империяның бір бөлшегі елестейді.

Тәуелсіздік таңында қуатты мемлекет болып құрылатынымызға сенімсіздік білдірген жағдайлар да ұшырасты. Алайда ел қолға алған ауыр жүкті көтере білді. Оған куә – бүгінгі әлеуметтік – экономикалық салалардағы қол жеткен жетістіктер, еңсесі көтерілген елдің тұрмыс жағдайы, мемлекеттің халықаралық деңгейдегі орны.

Қазақстан қазір тәуелсіздігі тұғырлы, экономикалық, саяси және әлеуметтік жетістіктері алыс-жақынды бірдей мойындатып отырған ірі мемлекет.
Осы ұлы істер мен биік мұраттар жолында Қазақстан қоғамын өркениетке бастаған Республикамыздың тұңғыш президенті Нұрсұлтан Әбішұлы Назарбаевтың сарабдал саясатының арқасында деп білеміз. Тәуба, Тәуелсіздік арқасында елдің еңсесі биіктеді, рухы қайта шалқыды.

Енді, міне, өмірдің сол бір өтпелі кезеңін абыроймен еңсерген тамаша кездің куәсіміз. Осының өзі –халқымыздың қайратын ұштап, қанатын қарыштай қағуына қарымды себеп болды десек еш қателеспейміз. Бүгін соның айқын куәсі, жайыла аққан Жайық, толқынды Каспий жағалауындағы қазыналы өлке - Атырауым жайлы сөз қозғамақпын.

Бұл жер – бабалар кір жуып, кіндік кескен қасиетті мекеніміз, атадан қалған асыл мұрамыз, баға жетпес байлығымыз, мызғымас қара шаңырағымыз. Сонау Еділ мен Маңғыстауға дейін, Мұғалжар тауларының кәрі Каспийге дейін созылып жатқан, кең байтақ біздің Атырау облысы «қара алтынның», балықшылар мен шопандар даңқының өлкесі.

Атырау тарихына үңілер болсақ, 1938 жылғы «Гурьев» облысын құру туралы қаулыға дейін қазыналы өлке аты мың өзгеріп отырған. Атырау –Еуропа мен Азия құрлықтарының шекарасындағы әсем қала . 1991 жылға дейін қала Гурьев деп аталды. Кейін Атырауға ауыстырылып, теңіз жағасындағы қала Қазақстанның ірі қалаларының біріне айналды.

Дегенмен, барша қазақ даласы сынды Атырау алқабы да сайраған көне шежіренің куәсі, ал кәрі Каспий болса, ол тек Ақ Жайық суымен ғана емес, бұл аймақ ата-бабамыздың тарихымен де толы. Бұл жерден қалың қазағына жанға жайлы қоныс іздеп, желмаясымен арман қуып Асан қайғы баба өтті. Жүрген жолын қырып-жойып, құмырсқадай қаптаған қалың қолмен өрт жайлатып Бату хан өтті.

Бостандық қылышын көтеріп, қылыштан өткір ойлы сөзін төккен Сырым би өтті, отаршылдық ордасын халық қамы үшін қиратсам деп, беліне садақ байлаған, аз қолмен мыңдаған жауына қарсы шапқан ердің соңы Исатай бармағын тістеп, ол да өтті. Елі үшін еңіреп, қара бала қамы үшін қылышы мен жырын қоса көтеріп, Махамбет кетті арманда. Қайғы мен қасіретін, қайраты мен жігерін Құрманғазы мен Дина күй ғып төкті, Мұхит әнмен шырқап, Мұрат жырға қосты. Ия, бұл менің де Отаным, туған мекенім.

Аяулы, атамекен – алтын бесік,
Өзіңнен сағыныштың лебі есіп.
Арманым құшағыңда өмір сүру,
Шалқытып шабытымның жырын есіп.

«Атамекен», «Отан», «Туған жер» деген жүректен шыққан асыл сөздерді мақтанышпен, асқақтықпен айта аламыз. Себебі әркімнің туған жері – Мысыр шаһары деп, бекер айтылмаса керек. Қасиетті де киелі, қазыналы өлке, ару қалам Атырау – менің ата-бабамның мекені.

Бүгінгі күні сүйікті қаламда ынтымақ пен бірлігіміздің, нәтижелі істеріміз бен ұтымды шешімдеріміздің арқасында біраз шаруа, көптеген шара атқарылып, республикадағы жетекші өңірге айналып, адам танымастай өзгеріп, адамзат баласын таңқалдыруда. Атырау қаласының көшелері гүлдермен көмкеріліп, барлық көшелері түгел асфальттанып, жаңа алаңдар, гүлзарлар, су бұрқақтары пайда болып, көздің жауын алатын көптеген әкімшілік кеңселері, бизнес орталықтары, сауда орындары, банктер, ескерткіштер шаһардың шырайын шығарды.

Жыл сайын мыңдаған тұрғын үйлер мен дене шынықтыру –сауықтыру кешендері, емханалар мен ауруханалар, білім ошақтары пайдалануға берілуде. Мектептерде сапалы білім алуға толық мүмкіндік бар. Компьютер сыныптары, физика, химия, биология, шет тілі, лингафон кабинеттері, интерактивті тақта, мультимедия бәрі-баршасы шәкірттердің білімді дүниетанымы мол, зерек болуына бағытталған. Бүгінде біз егемен ел атанып, әлемдік кеңістікке ендік. Тәубә! Тәуелсіздіктің жемісін енді қала ғана емес, ауылдар да көре бастады. Бүгінде Атырау облысындағы барлық елдімекендерге жүз пайыз сандық телефон жүргізілді.

Барлық мектептер компьютерлендіріліп, ғаламтор желісіне қосылды. Бұрын облыстың көптеген елдімекендері отынға қара май, көмір, қи-тезек жағып, ауыл үйлерін қара түтінге, күлге көміп, ауаны бүлдіріп жататын еді. Бүгінде барлық елдімекендерге табиғи газ желілері тартылып, тұрғындар «көгілдір отынның» рахатына бөленуде. Зейнетақы, жәрдемақы, айлық табыс дегендер дәл сол күні қолдарға тиіп жатады.

Сөйтіп Атырау бүгінде, қазіргі заманға сай өркениетті шаһарға айналды. Талай қас батырлар жанын қиып,қорғап қалған,талай тіршілік иесі нәр алып жаралған,талай өзегі өртенген өкінішті жандар мен қуаныштан жүрегі жарыла шаттанған пенделердің куәгері болған қасиетті туған өлкем- Атырауым. Бұл біздің – қаламыз! Бұл – біздің Атырауымыз!
Мен өз Отанымды, туған жерімді, құдіретті елімді сүйемін және мақтан етемін.

Разиева Майра Серікғалиқызы
Атырау энергетика және құрылыс колледжі оқытушысы

«Туған өлкем» («Менің Қазақстаным») жарияланымдар байқауына

Рейтинг	Регион	Аким
219022	Алматинская область
146708	Туркестанская область
108999	Восточно-Казахстанская область

Рейтинг	Регион	Аким
339	Алматинская область
195	Туркестанская область
180	Северо-Казахстанская область

« Апрель 2024 »
Пн	Вт	Ср	Чт	Пт	Сб	Вс
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30

Мы в соц сетях:

Атырау – ардақты қалам

Поделиться материалом

Другие материалы по теме

По читаемости

По материалам